Zaev: Do ta dërgojmë ftesën që Kosova t’i bashkohet mini-shengenit

Zaev: Do ta dërgojmë ftesën që Kosova t’i bashkohet mini-shengenit

Kryeministri i Maqedonisë së Veriut, Zoran Zaev në konferencën për media me kryeministrin Avdullah Hoti i ka bërë ftesë Kosovës që të bashkangjitet në iniciativën rajonale të minishengenit ballkanik.

Zaev ka thënë se të premten do të takohet me presidentin Vuçiq dhe kryeministrin Rama ku edhe do të dërgojnë ftesën për Kosovën që t’u bashkohet në nismën rajonale.

“Të premten e ardhshme do të kem takim me Vuçiq dhe Ramën dhe një nga pikat do të jetë kjo që të dërgojmë një ftesë të përbashkët. Presim që Kosova t’i bashkangjitet bashkëpunimit rajonal i cili e udhëheq Maqedonia e Veriut, Serbia dhe Prishtina me qëllim që të jetë prioritet për rajonin pa dallim të çështjeve të hapura politike”, ka thënë Zaev.

Tutje, Zaev në fjalën e tij e ka përshëndetur arritjen e marrëveshjes e 4 shtatorit në Washington mes Kosovës dhe Serbisë dhe ka mbështetur rifillimin e dialogut mes dy shteteve.

“E përshëndesim marrëveshjen për normalizim ekonomik në Ëashington mes Kosovës dhe Serbisë, dhe I japim përkrahje procesit të dialogut të ndërmjetësuar nga BE’ja”, ka thënë Zaev.