Popullsia e Kinës u rrit me ritmin e saj më të ngadaltë gjatë kësaj dekade, sipas të dhënave të qeverisë të publikuara të martën.

Shkalla mesatare e rritjes vjetore ishte 0.53% gjatë 10 viteve të fundit, poshtë nga një normë prej 0.57% midis 2000 dhe 201,  duke e çuar popullsinë në 1.41 miliardë.

Rezultatet shtojnë presionin mbi Pekinin për të rritur masat që çiftet të kenë më shumë foshnje dhe të shmangin rënien e popullsisë.

Rezultatet u njoftuan në një regjistrim një herë në dekadë, i cili fillimisht pritej të dilte në prill, shkruan BBC, përcjell abcnews.al.

Regjistrimi u krye në fund të vitit 2020, ku rreth shtatë milionë regjistrues kishin shkuar derë më derë për të mbledhur informacione nga familjet kineze.

Duke pasur parasysh numrin e madh të njerëzve të anketuar, ai konsiderohet si burimi më i plotë për popullsinë e Kinës, i cili është i rëndësishëm për planifikimin e ardhshëm.

Ning Jizhe, kreu i Byrosë Kombëtare të Statistikave zbuloi se 12 milion foshnje kanë lindur vitin e kaluar,  një rënie e konsiderueshme nga 18 milion foshnje të porsalindura në 2016.