Është hapur Panairi i Punës 2017 në Mitrovicë, me ç’rast janë prezantuar mbi 310 vende të lira pune nga gjithsej 46 sipërmarrje.

Besmir Salihu, drejtor i Zyrës së Punësimit në Mitrovicë, pasi ka falënderuar  organizatorët e këtij panairi, ka folur për rëndesën e këtij panairi, ku punëdhënësit  dhe punëkërkuesit  kanë mundësi të marrin informacione për tregun e punës.

Ndërsa në fjalën e tij Kryetari i Mitrovicës, Agim Bahtiri, ka  falënderuar ministrin e  Punës dhe Mirëqenies Sociale, Skender Reçica, dhe tha seë ndjehet i kënaqur që është pjesë e hapjes së këtij panairi, i cili është një mundësi e mirë si për bizneset ashtu  edhe për  punëkërkuesit që të përfitojnë nga njëri tjetri.

Ministri Reçica, tha se ky panair i punës konsiderohet të jetë mjaft i rëndësishëm për ndërmarrjet e Mitrovicës e po ashtu edhe për të rinjtë, si një mundësi e mirë për zhvillim të karrierës ku dihet se kërkesat për punë ditëve të sotme janë të mëdha.

Ky panair u organizua nga Komuna e Mitrovicës, në bashkëpunim me Ministrinë e Punës dhe Mirëqenies Sociale, Agjencinë e Punësimit të Republikës së Kosovës dhe Zyrën  Gjermane për Bashkëpunim Ndërkombëtar.