Kryetari i Lëvizjes Vetëvendosje, Albin Kurti, në ditën ndërkombëtare për personat e zhdukur ka thënë se fati i 1652 të pagjeturve ende mbahet peng në errësirat e zyrave të shtetit serb.

Sipas tij, të mos kërkosh drejtësi për të pagjeturit do të thotë ta zhdukësh veten prej drejtësisë.

“Paqja, ardhmëria dhe zhvillimi nuk e mbushin kurrë boshin dhe mungesën e tyre. Brenga për të pagjeturit na mëson se paqen në jetë e sjell vetëm vendosja e drejtësisë”, ka shkruar lideri i VV-së.

Më poshtë mund ta lexoni shkrimin e plotë të tij në Facebook:

Në ditën ndërkombëtare për personat e zhdukur, kryetari i Lëvizjes VETËVENDOSJE!, Albin Kurti bashkë me ish-deputetë, anëtarë të kryesisë dhe aktivistë të Lëvizjes mbajtën homazhe në sheshin Skënderbeu para përmendores dedikuar të pagjeturve të luftës.

Prej luftës së fundit në Kosovë fati i 1652 të pagjeturve ende mbahet peng në errësirat e zyrave të shtetit serb. Familjarët e tyre ende kërkojnë të vërtetën dhe drejtësinë për ta. Fati i të pagjeturve është ngushtësisht i lidhur me fatin tonë, të mos kërkosh drejtësi për ta do të thotë ta zhdukësh veten prej drejtësisë. Paqja, ardhmëria dhe zhvillimi nuk e mbushin kurrë boshin dhe mungesën e tyre. Brenga për të pagjeturit na mëson se paqen në jetë e sjell vetëm vendosja e drejtësisë.