Kryeministri slloven jep dorëheqje, kërkon zgjedhje të parakohshme

Kryeministri slloven jep dorëheqje, kërkon zgjedhje të parakohshme

Kryeministri slloven Marjan Sarec tha se ai do të dorëzonte dorëheqjen e tij në parlament dhe bëri thirrje për zgjedhje të parakohshme, duke thënë se qeveria e tij e pakicës nuk mund të kalojë legjislacion të rëndësishëm.

Sipas mediave të huaja, përcjell Telegrafi, koalicioni qeverisës i pesë partive të qendrës së majtë, të cilat morën pushtetin në shtator 2018, mbajtën vetëm 43 nga 90 vendet në parlament.

Pasi humbi mbështetjen joformale të Partisë së Majtë të opozitës në nëntor, ai ka pasur gjithnjë e më të vështirë kalimin e ligjeve përmes parlamentit.

“Me këtë koalicion, këtë situatë në parlament, unë nuk mund t’i plotësoj pritjet e njerëzve”, tha Sarec në një konferencë shtypi.

Pak para deklaratës së tij, agjencia kombëtare e lajmeve STA raportoi dorëheqjen e Ministrit të Financave, Andrej Bertoncelj.

Analistët thonë se Partia Demokratike Sllovene (SDS) e qendrës së djathtë e opozitës, e cila është partia më e madhe në parlament, ka të ngjarë të përpiqet të formojë një qeveri të re.

Zgjedhjet e parakohshme do të zhvilloheshin vetëm nëse kjo përpjekje dështon.