Shtetet  e Bashkuara të Amerikës kanë intensifikuar punën për çështjen e  dialogut Kosovë-Serbi. Javëve të fundit ata kanë shfaqur një interesim  më të madh në mënyrë që të arrijnë një marrëveshje mes të dyja vendeve.

I dërguari i SHBA-ve për dialogun  Kosovë-Serbi, Richard Grenell vazhdimisht është duke iu bërë thirrje  institucioneve kosovare që të heqin taksën 100 për qind ndaj mallrave  serbe, në mënyrë që t’i hapet rrugë vazhdimit të dialogut.

Me ndërmjetësim të Grenell, presidenti i Kosovës Hashim Thaçi dhe  homologu i tij serb, Aleksandar Vuçiq janë takuar të hënën në Uashington  ku kanë diskutuar për të dyja vendet. Vuçiq e ka përsëritur qëndrimin e  tij se pa heqje të taksës nuk do të rikthehen në dialog.

Presioni i SHBA-ve për ta hequr taksën dhe për t’i kthyer të dyja palët në tavolinën e bisedimeve nuk ka qenë kurrë më i madh.

Përkushtimi i madh i Amerikës, ka lënë nën hije Bashkimin Evropian.  Në media është raportuar se nga këta të fundit nuk po shfaqet më  angazhimi i mëparshëm për çështjen e dialogut.

Peter Stano, zëdhënës i përfaqësuesit të Lartë të Bashkimit Evropian  për Politikë të Jashtme, Josep Borrell, ka thënë për lajmi.net se roli i  BE-së për këtë çështje nuk ka ndryshuar dhe mbetet i njëjti.

“Dialogu është diçka që ndërmjetësohet nga Bashkimi Evropian, ka vija  dhe vendime që qartë e definojnë rolin e BE-së dhe përfaqësuesit të  lartë në avancimin dhe lehtësimin e dialogut. Roli i tij nuk ka  ndryshuar dhe përkushtimi i tij ka qenë i shfaqur edhe në vizitat e tij  të fundit në Kosovë dhe në Serbi. Ai ka njoftuar të dyja palët se është  shumë e rëndësishme që ta shtyjmë dialogun përpara, sepse statusi aktual  nuk është i kënaqshëm dhe kur vjen fjala e marrëveshjeve, ne i  mirëpresim çdo lloj marrëveshje që i afron palët andaj ne i përshëndesim  marrëveshjet e fundit për trafikun ajror dhe hekurudhor sepse janë hapa  që afrojnë tek normalizimi i raporteve”, ka thënë Stano për lajmi.net.

Ai ka theksuar se roli i BE-së është mjaft përmbajtësor, pasi po iu  ndihmojnë të dyja palëve të kthehen në tavolinën e bisedimeve.

“Roli i BE-së është mjaft përmbajtësor, ne i ndihmojmë të dyja palët  që të kthehen tek tavolina e negociatave, të krijojnë kushtet për  lëvizje përpara dhe siç ka thënë edhe përfaqësuesi i lartë në vizitën e  tij të fundit në Prishtinë, ne kemi investuar 1 miliard euro veçanërisht  në Kosovë andaj kjo është diçka e qartë nëse i llogarisni edhe  deklaratat dhe punën e vërtetë në terren po ashtu edhe rezultatet sa i  përket implementimit pastaj e shihni se roli i BE-së është shumë, shumë i  fortë”, ka shtuar Stano.

Gjatë takimit në Uashington, Vuçiq ka theksuar se SHBA-të nuk i kanë  kërkuar Serbisë ndonjë lëshim në këmbim të heqjes së tarifës. Ndërsa,  qeveria kosovare përkundër presionit, nuk po ndërmerrë masa për ta hequr  taksën pasi po deklarojnë se Serbia nuk po e ndalë lobimin kundër  Kosovës