Sulmi me raketa ruse në një bazë ushtarake ukrainase pranë kufirit polak dje ishte përpjekje për të "kërcënuar" NATO-n, tha për BBC-në zëvendësministri i Jashtëm i Polonisë, Marcin Przydacz.

Të paktën 35 njerëz vdiqën në sulmin në bazën e trajnimit Yavoriv, rreth 20 kilometra nga kufiri me Poloninë, një anëtare e aleancës ushtarake perëndimore.

Przydacz i tha programit Today të BBC-së se lëvizja e Rusisë ishte “shumë provokuese”.

“Ata me siguri e dinin se kjo bazë ushtarake ishte vendosur shumë afër kufirit polak,” thotë ai.

“Pra, natyrisht, rusët e dinin se çfarë po goditnin dhe donin të kërcënonin NATO-n… Ata donin të dërgonin një mesazh duke kërcënuar NATO-n.”

Przydacz thotë se ka frikë se “vendi im dhe disa vende të tjera janë disi në rrezik pasi zoti Putin po përpiqet të shkatërrojë botën në të cilën po jetojmë”.