Sekretari amerikan i Mbrojtjes Lloyd Austin tha të mërkurën se trupat e Koresë së Veriut të veshur me uniforma ruse dhe me pajisje ruse po lëvizin drejt Ukrainës, në atë që ai e quajti një zhvillim të rrezikshëm dhe destabilizues.

Austin po fliste në një konferencë shtypi në Washington me Ministrin e Mbrojtjes së Koresë së Jugut, Kim Yong-hyun, ndërsa shqetësimet rriten për vendosjen e 12,000 trupave të Phenianit në Rusi.

SHBA-ja dhe Koreja e Jugut thonë se disa nga trupat e Koresë së Veriut po shkojnë në rajonin rus të Kurskut në kufirin me Ukrainën, ku forcat e Kremlinit kanë luftuar për të zmbrapsur një inkursion ukrainas.

Disa njësi avancuese të Koresë së Veriut kanë mbërritur tashmë në rajonin e Kurskut dhe Austin tha se “mundësia është shumë e lartë” që Rusia të përdorë trupat në luftime, raporton Associated Press.

Lëvizja e Koresë së Veriut për të forcuar marrëdhëniet e saj me Rusinë ka shkaktuar alarme në të gjithë globin, pasi liderët shqetësohen se si mund të zgjerojë luftën në Ukrainë dhe çfarë ndihme ushtarake ruse do t’i dërgohet Phenianit në këmbim.

Ambasadori i Ukrainës në OKB, Sergiy Kyslytsya, duke folur në një takim urgjent të Këshillit të Sigurimit të OKB-së të mërkurën, tha se ata presin që deri në 4,500 trupa të Koresë së Veriut të jenë në kufi këtë javë dhe të fillojnë të marrin pjesë drejtpërdrejt në operacionet luftarake kundër forcave ukrainase në nëntor.