Kjo ngjarje po konsiderohet si njëra ndër më të rëndësishmet këtë vit për Kosovën.
Tashmë, është bërë publike logoja zyrtare institucionale e 10 vjetorit të shtetësisë së Kosovës , dhe ajo është komentuar në mënyra të ndryshme.
Në një përgjigje për lajmi.net nga Zyra e Kryeministrit Haradinaj, është thënë që kjo logo është derivat i simboleve zyrtare shtetërore në kombinim me ngjyrat e flamurit shtetëror, ku dy duart e hapura dhe dhjetë gishtat nënkuptojnë ditëlindjen e dhjetë të shtetit të Kosovës dhe kontributin në paqen rajonale.
“Deri më tash publike është bërë logoja zyrtare e organizimeve institucionale që do të bëhen për këtë 10 vjetor të shtetësisë sonë. Logoja është derivat i simboleve zyrtare shtetërore, me ngjyrat e flamurit tonë shtetëror. Dy duar të hapura dhe dhjetë gishta, përveçse nënkuptojnë ditëlindjen e dhjetë të shtetit tonë, nënkuptojnë edhe 10 vjet kontribut në paqen rajonale.” thuhet më tej në përgjigje.
Nga zyra e Kryeministrit bëjnë të ditur që festimet për 10 vjetor të shtetësisë do të zgjasin pikërisht 10 ditë, nga data 8 e deri më 18 shkurt .
Organizimet do të mbahen nën patronatin e Presidentit të Kosovës, Hashim Thaçit, me ndihmën edhe të Qeverisë së Kosovës.
“Organizimet për këtë manifestim tashmë kanë filluar dhe ne si Qeveri, që jemi edhe pjesë e Këshillit Organizativ nën Patronatin e Presidentit të Kosovës, bashkërisht kemi vendosur që festa të zgjasë 10 ditë, nga data 8 deri më 18 shkurt, si simbolikë e 10 vjetorit të pavarësisë.” bëhet e ditur nga Zyra e Kryeministrit.
Meliza Haradinaj-Stublla, këshilltare politike e Kryeministrit Haradinaj bëri të ditur për lajmi.net se programi festiv do të bëhet publik shumë shpejt dhe se do të jetë gjithëpërfshirës, si dhe përmbledhje e të gjitha ngjarjeve e sakrificave të shtetit tonë.
“Programi festiv do të bëhët publik shumë shpejtë, mund të konfirmoj se do të jetë gjithëpërfshirës, dhe përmbledhje e të gjitha ngjarjeve e sakrificave të deritanishme tonat. Në kuadër të kësaj, do të ketë edhe nderim të të gjithë atyre që kontribuan që ne të gëzojmë e festojmë këtë ditë.” bën të ditur Këshilltarja Politike nga kabineti i Kryemininistrit Haradinaj.