Një “gjuetar” ofertash bleu një makinë të përdorur për të udhëtuar nga Londra për në Bristol, pasi i kushtoi më lirë të udhëtonte me të se sa të paguante biletën e trenit prej 218 sterlinash, transmeton TCH. Edhe pse në kosto përfshiu taksën e rrugës dhe siguracionin e makinës, sërish ishte më e levërdisshme për Tom Church se sa të merrte trenin.

Por si i bëri llogaritë 27-vjeçari?

Bleu një Honda Civic të vitit 1997: 80 sterlina

Pagoi siguracion për 24 orë: 20,43 sterlina

Bleu abone 6-mujore për rrugën: 81,39 sterlina

Karburanti: 24,99 sterlina

Totali: 206,81 sterlina

Çmimi i një bilete vajtje-ardhje Londër-Bristol, blerë në stacion: 218,1 sterlina.

Gati 11 sterlina fitim, jo keq për dikë që ruan raste të tilla. “Makinën ia bleva një gruaje të moshuar, që nuk e përdorte më, praktikisht e kishte nxjerrë në shitje për skrap. Por motori ishte i mirë dhe punonte. Tani kam ndërmend t’i bëj ca riparime dhe ta shes. Mendoj se do t’i marr asaj makine 200 stërlina”, tha Church. “Plus që mund të rimbursohem për abonenë e pakonsumuar, kështu që do të fitoj para të tjera”.